Servisio2018-08-11T05:42:19+00:00

Servisio

E programa di Mikro Fiansa ta spesial pa abo ku ke tin bo mes negoshi, ke sa kiko mester hasi pa por ta un empresario responsabel i eksitoso i ku tin algun reto manera falta di preparashon, guia i akseso na finansiamentu ku kondishonnan ku ta tene kuenta ku bo situashon partikular.

Training i coaching

Probechá apliká pa bo haña nèt e push ku bo mester pa realisá bo idea di negoshi. Komo mikro-empresario bo ta haña tep i guia pa bo ta mas sigur di loke bo mester sa pa kumpli ku tur regla di negoshi.

Durashon

Pa garantisá mas éksito, partisipantenan selektá ta haña un aña di training i coaching intensivo. E tim di guia di Mikro Fiansa ta bishitá i interaktá regularmente ku e mikro-empresario den e periodo akí. Despues ta sigui un aña di seshon pa monitoriá e progreso.

Kompromiso

Tur seshon ta interaktivo, fásil pa sigui i ku atenshon personal pa kada mikro-empresa. E enfoke ta riba preparashon i guia pa empoderá i desaroyá abilidatnan pa kada mikro-empresario logra ta mas independiente posibel. E programa ta grátis, pero bo ta komprometé ku bo palabra, aktitut i akto komo profeshonal.

Mikro Fiansa

Mikro Fiansa ta un tipo di fiansa ku partikular:
sèn di e fiansa ta bai direktamente pa e proveedó di e material ku e empresario mester pa e por produsí i realisá e trabou nesesario pa e negoshi por kana.

Pues, e fiadó mes no ta risibí sèn di e fiansa riba su kuenta, sino e material pa e por produsí. Sèn di e mikro fiansa ta bai direktamente na pago di e proveedó di e material ku e empresario mester pa por produsí pa por duna su servisio i bende mesora. Asina e mikro empresario por kumpli ku pago di e fiansa bèk segun palabrashon.

Ademas, e fiansa ta mará na un aña di training i coaching intensivo, siguí pa un aña mas di seshon pa monitoriá e progreso. Determinashon di e partisipante pa prepará su mes bon ta krusial.

Kolaborashon

Ku e programa ‘Mikro Fiansa’ e korporashon pa desaroyo di Kòrsou KORPODEKO huntu ku e Sektor di Labor di Ministerio di Desaroyo Sosial, Labor i Bienestar (SOAW) i Ministerio di Desaroyo Ekonómiko (MEO) ke promové desaroyo sosial ekonómiko duradero di Kòrsou. E programa akí ta kanalisá rekursonan di Korpodeko i Gobièrnu di Kòrsou pa empoderá komunidat i stimulá desaroyo sosial ekonómiko duradero pa nos nashon.