KOMUNIKADO MIKRO FIANSA 2018 – MIKRO HAPPY HOUR KOLEGIO ERASMO

INTERES PA TRAYEKTO DI MIKRO FIANSA I MIKRO HAPPY HOUR TA SIGUI BIBU. E aktividat di Mikro Happy Hour ta sigui hala atenshon di gran kantidat di pèrsona interesá den kuminsá òf strukturá nan mes pa nan por tin un negoshi di nan mes, hasiendo loke nan gusta hasi òf ofresé.

Djabièrnè último, 23 di mart, e tim di Mikro Fiansa a organisá e di 5 Mikro Happy Hour, e biaha aki dirigí na e barionan di Suffisant, Muizenberg i besindario na Kolegio Erasmo. Meskos ku e promé 4 seshonnan di Mikro Happy Hour na e sentronan di bario di Soto, Tera Kòrá i Souax i Kas di Bario Sta. Maria, e aktividat akí tambe por a konta ku presensia i aplikashon di personanan interesá den oportunidat pa traha riba nan͞mes kos͟.

E señal fuerte i positivo ku e tim di Mikro Fiansa ta risibiendo ta ku komunidat di Kòrsou ta sumamente interesá den oportunidat pa hasi negoshi. Te ku aprel 2018 Korpodeko, SOAW i MEO ta sigui bai den diferente bario di Kòrsou pa buska i selektá e promé grupo di partisipante ku lo haña guia, preparashon i finansiamentu chikí den e programa “Mikro Fiansa”. Interesadonan ku a inskribí ta keda inkluí den e grupo ku lo por yuda hasi diferensia den ekonomia
di Kòrsou. Kontenido programa Mikro Fiansa E programa Mikro Fiansa ta ofresé 4 luna di training na e partisipante. E training ta inkluí guia pa desaroyá e idea di kada partisipante i yudansa durante e proseso di lanta e negoshi. E fiansa ta bai diréktamente na material produktivo pa e empresario por enfoká mas lihé posíbel riba e proseso di produkshon pa por yega na e resultadonan proyektá. Despues di e fiansa ta sigui un periodo di guia pa 1 aña pa sigui empoderá e mikro empresario.

2018-07-31T04:35:01+00:00