KOMUNIKADO MIKRO FIANSA 2018 – ‘MIKRO HAPPY HOUR’ NA KAS DI BARIO STA. MARIA 

Despues di e promé tres seshonnan di Mikro Happy Hour na e sentronan di bario di Soto, Tera Kòrá i Souax dirigí riba e area di Band’Abou, e tim di Mikro Fiansa ta prepará pa e siguiente Mikro Happy Hour. E biaha aki lo enfoká riba habitantenan di e area di Sta. Maria i besindario i tambe lo ta habrí pa tur ku ta interesá den un oportunidat pa traha riba nan “mes kos”.

E señal fuerte i positivo ku e tim di Mikro Fiansa ta risibiendo ta ku komunidat di Kòrsou ta mashá interesá den oportunidat pa hasi negoshi. Te ku aprel 2018 Korpodeko, SOAW i MEO ta sigui bai den diferente bario di Kòrsou pa buska i selektá e promé grupo di partisipante ku lo haña guia, preparashon i finansiamentu chikí den e programa “Mikro Fiansa”. Interesadonan ku a inskribí ta keda inkluí den e grupo ku lo por yuda hasi diferensia den ekonomia di Kòrsou.

Kontenido programa Mikro Fiansa

E programa Mikro Fiansa ta ofresé 4 luna di training na e partisipante. E training ta inkluí guia pa desaroyá e idea di kada partisipante i i yudansa durante e proseso di lanta e negoshi. E fiansa ta bai diréktamente na material produktivo pa e empresario por enfoká mas lihé posibel riba e proseso di produkshon pa por yega na e resultadonan proyektá. Despues di e fiansa ta sigui un periodo di guia pa 1 aña pa sigui empoderá e mikro empresario.

2018-07-31T04:35:48+00:00