KOMUNIKADO MIKRO FIANSA 2018 – ‘MIKRO HAPPY HOUR’ NA SENTRO DI BARIO SOTO

BAND’ABOU TA BROTA KU INTERES PA MIKRO EMPRESA

E mensahe di habitantenan di Westpunt, Lagun, Soto, Barber, Dokterstuin i besindario ta indiskutíbel: e momentu a yega pa traha riba “nos mes kos”. Mas ku 130 persona tabata presente na e Mikro Happy Hour organisá pa Korpodeko, SOAW i MEO djabièrnè último, 16 di febrüari na Sentro di Bario Soto. Te ku aprel 2018 Korpodeko, SOAW i MEO

ta bai den e barionan di Kòrsou pa buska i selektá e promé grupo di partisipante ku lo haña guia, preparashon i finansiamentu chikí den e programa “Mikro Fiansa”.

Interesadonan ku a inskribí ta keda inkluí den e grupo ku lo por yuda hasi diferensia den ekonomia di Kòrsou.

Kontenido programa Mikro Fiansa

E programa Mikro Fiansa ta ofresé 4 luna di training na e partisipante. E training ta inkluí guia pa desaroyá e idea di kada partisipante i i yudansa durante e proseso di lanta e negoshi. E fiansa ta pa un suma máksimo di te ku 5.000 florin. E montante di e fiansa ta bai na material produktivo i ta paga e bendedó direktamente. Despues di e fiansa ta sigui un periodo di guia pa 12 luna pa yudagarantisá éksito di e mikro empresario.

Espektativa

Korpodeko, SOAW i MEO a visualisá un nesesidat pa e konsepto di Mikro Fiansa i ku mester a aserká tur area di Kòrsou pa ofresé e oportunidat aki. No opstante esei, e sala yen di personanan interesá den lantamentu di negoshi, informashon tokante Mikro Fiansa i tur kos empresarial den Sentro di Bario Soto tabata impreshonante.

Direktor di Korpodeko Chesron Isidora i Minister di Desaroyo Sosial, Labor i Bienestar (SOAW) Sr. Hensley Koeiman, na nòmber tambe di Minister di Desaroyo Ekonómiko (MEO) Sr. Steven Martina, ta sumamente satisfecho ku e promé ‘Mikro Happy Hour’ ku enfoke riba e area di Banda’abou. Gran kantidat di interesado a registrá mesora i a hasi uso di e oportunidat pa hasi pregunta i interkambiá idea ku e tim di Mikro Fiansa.

Minister di SOAW Sr. Hensley Koeiman a enfatisá ku diferente empresario eksitoso a kuminsá ku algu chikí i ku tempu, dedikashon i kurashi a krese bira kompanianan grandi i asta multinashonal. Esnan ku idea pa negoshi i ta klá pa traha duru pa logra krea trabou pa nan mes i kisas asta pa otronan por kuminsá chikí i ku yudansa i algu di rekurso.

Di parti di Korpodeko Sr. Isidora a splika mas tokante e situashon i nesesidat di un mikro empresario i e motibu dikon ta importante pa por kombiná e mikro fiansa ku un trayekto di guia, preparashon i yudansa di otro profeshonalnan spesialisá riba diferente aspekto di hasimentu di negoshi. Sr. Isidora a enfatisá ku proyektonan mas grandi no ta kalifiká den Mikro Fiansa, pero si lo por ta algu pa e trayekto stándart di Korpodeko i ta enkurashá tur ku tin proyektonan mas grandi pa tuma kontakto ku Korpodeko na 7381799 of manda email na [email protected]

2018-09-02T03:08:54+00:00